StrinitaS - Маленькія глыбачане далучыліся да малітоўнай акцыі “Мільён дзяцей моліцца на ружанцы”

Маленькія глыбачане далучыліся да малітоўнай акцыі “Мільён дзяцей моліцца на ружанцы”

Падрабязнасці: Апублікавана 20.10.2022 14:29

У Мінскім Хрысціянскім Сацыяльным цэнтры 18 кастрычніка адбылася супольная малітва “Мільён дзяцей моліцца на ружанцы”. Гэта сусветная ініцыятыва, арганізаваная Папскім фондам “Дапамога Касцёлу ў патрэбе”.

Упершыню такая ружанцовая малітва адбылася ў 2005 годзе ў Каракасе, сталіцы Венесуэлы. Падчас малітвы групы дзяцей у прыдарожнай каплічцы, прысутныя жанчыны, адчулі глыбокую блізкасць Панны Марыі. Ім адразу прыгадалася абяцанне айца Піа: “Калі мільён дзяцей разам памоляцца Ружанцам, свет зменіцца.”

З таго моманту да ініцыятывы далучыліся сотні тысяч дзяцей. У Беларусі такая ружанцовая малітва адбылася ўжо трэці раз. Сёлета ў свята святога Евангеліста Лукі, дзеці і іх бацькі разам са сваімі душпастырамі і законнымі сёстрамі аб’ядналіся ў супольнай малітве каб прасіць аб міры і супакоі ў сваіх дамах, сем’ях, краіне і ва ўсім свеце.

Праз сучасныя сродкі камунікацыі да дзяцей з Хрысціянскага Сацыяльнага Цэнтра ў Мінску далучыліся дзеці з Бярозы, Глыбокага, Магілёва, Мінска.

Напачатку малітвы ўсіх удзельнікаў прывітала сястра Часлава Навіцкая, якая зазначыла, што ў наш час, як ніколі кожны чалавек адчувае патрэбу ружанцовай малітвы. Сястра Часлава падзякавала прысутным мітрапаліту Юзафу Станеўскаму, арцыбіскупу на пенсіі Тадэвушу Кандрусевічу і біскупу Юрыю Касабуцкаму за жаданне маліцца разам з наймалодшай паствай – дзецьмі Беларусі.

ruzhanets 06

Мінск маліўся першую балесную таямніцу. Другую таямніцу “Бічаванне Хрыста” праводзілі малодшыя парафіяне з Глыбокага разам з пастырам Віцебскай дыяцэзіі біскупам Алегам Буткевічам. Удзельнікі малітвы прасілі Маці Бічаванага Езуса, каб ніякія жыццёвыя цяжкасці не змаглі адлучыць нас ад любові Божай. У трэцяй таямніцы дзеці з Магілёва разам з біскупам Аляксандрам Яшэўскім засяродзіліся над тым, што Хрыстос пераносіў вялікія цярпенні, але не наракаў. У чацвертай таямніцы дзеці з Бярозы (Пінская дыяцэзія) разважалі над таямніцай адкуплення, якая споўнілася на дарозе крыжовай. Пятую таямніцу маліліся дзеці з Гродна разам з біскупам Аляксандрам Кашкевічам.

Такой была дзіцячая ружанцовая малітва: напоўненая шчырасцю, беспарэднасцю і бясконцай верай, што праз апеку Маці Божай, усе малітвы будуць выслуханыя. А гэта значыць, разам мы наблізімся да супакою ў нашых сэрцах, сем’ях, у нашай краіне і ва ўсім свеце.